Dema li kolanên Wargeha Penaberan a Şehîd Rûstem Cûdî (Mexmûr) digeriyan, dengê govendê û stranên govendê em ber bi xwe ve dikişand. Me jî berê xwe da cihê ku dengê stranên govendê jê hiltê.
Her em nêzîk bûn dengê stranê xweştir hate me û heta gihan wir. Me xwe li Navenda Çand û Hunerê ya Mexmûr (NÇNM) xwe dît.
Li ser dikê me dît komek zarokan li ber stranên govendê mest bûne û govendê digerînin. Ji rengê wan û dîsa govendên wan diyar bû ku xwe nû fêr dikin û amadekariyekê dikin.
Ev yek pir bala me kişand, zêdetir ber û wan çûn û silav da wan. Wan jî em bi kêfxweşî pêşwazî kir û dîsa hinek kelecanî û şermîn bûn.
BÊRÎTAN DESTMALA KESK-SOR-ZER DIHEJÎNE
Li ser dikê komek zarokên keç ku temenê wan navbera 10-12 salî de bûn li ber stranan piranî wan pêxas govend digerandin. Bêrîtan li ser govendê bû û destmala kesk, sor û zer dihejand. Bêrîtan li ser govendê weke çûkan di firiya û bi ken serkêşiya govendê dikir.
BI ŞERMÎN NÊZÎ ME DIBÛN
Me çi kir nekir li ber kamerayê ji bo me ne axivî. Dîsa giştî şermîn bû û ji kamerayê direviyan. Bi hêvî û lavayan me ji wan xwest ku ji bo me jî govendê bigerîne em hinek li wan binêrin. Piştî govendê min xwe nêzî Bêrîtan kir û hewl da hinek din binasim.
‘BI BASK DIBIM Û DIFIRIM’
Bêrîtan 10 salî ye û wê bi sala nû ya dibistanê re derbasî dibistana navîn bibe. Bêrtan diyar kir ku ji bo fêrî govendê bibe û kêfxweşiyê berê xwe daye NÇHM’ê xwe fêrî govendê dibe. Li ser pirsa me ya bê ka çima hatî govendê? Bêrîtana biçûk bersiv da û got: “Ji bo fêr bibim û dîsa li gel hevalên xwe tim govendê digerînim. Her wiha li dibistanê jî govendê digrim.” Bêrîtanê anî ziman ku dema sergovendê digire, bask dibe û difire.”
Me ji Bêrîtan pirsî herî zêde hez ji kîjan govendê dikî, bi devek kenî got ji hemû govendan hez dikim.
KOMA GOVENDÊ YE
Me ji mamosteyê wan pirsî bê ka meseleya vê govendê çiye? Mamoste diyar kir ku hewl didin di bin sêwana NÇHM’ê de komeke govendê ya zarokan çêbike. Niha jî hewl tê dayîn ku komeke nû ava bikin, ev zarok jî ji bo provayan kom bûne û govendê digerînin.
ME XATIR XWEST, WAN JÎ GOVENDA XWE DOMAND
Piştî me bi çend xwendekarên din re hinek li ser rewşa wan û govendê sohbet kir, xatir ji wan xwest. Wan jî piştî xatirxwestina me govenda xwe ji cihê mayî dewam kir.
