Cemal Xetat li navçeya Kelar a Germiyanê nêzî 30 sale bi karê şêwekariyê ve mijule. Ew xweşiktiya xwezaya Kurdistanê bi taloyan xêz dike. Lê ew jî mîna gelek hunermendên din ên Başûr diyar dike, hunera welatên biyanî hunera Kurdistanê dagir kiriye.
Cemal Ebdulrehman Mehmud bi nasnav Cemal Xetat, di sala 1967’an de li gundê Mehmud Qecerî yê bajaroka Qoretu ya Xaneqînê hatiye dinê. Piştre derbasî navçeya Kelar a Germiyanê bûye û niha li wir dijî.
Cemal bi salane karê şêwekariyê dike. Heta niha 7 pêşangehên taybet ên şêwekariyê vekiriye. Her wiha bi tabloyên xwe tevli zêdetirî 100 pêşangehan bûye.
Cemal di piraniya tabloyên xwe de xweşiktiya xwezayê, çanda Kurdewarî, pezkuvî, balinde û sewalan xêz dike. Cemal diyarkir mirov tenê dikare bi xêzkirina tabloyan rastiya di hindirê xwe de xêz bike. Cemal got, mirov dikare bi xêzkirina tabloyan xweşî û nexweşiyên di hindirê xwe de nîşande.
Cemal da zanîn ji berku giringî bi karê wan nayê dayîn ew bi fikarin û wiha got; “Mixabin hemû avahiyên ku niha li Herêma Kurdistanê tên çêkirin, bi tabloyên welatên Çîn, Kanada û welatên Ewropî têne nexişandin. Tabloyên me jî di destê me dimînin û kes rewşa me napirse.”
Her wiha Cemal da zanîn di navbera salên 1980 ta 1991’an li herêma Germiyanê ji niha hîn zêdetir giringî bi karê şêwekariyê dihat dayîn.
Cemal Xetat jî mîna gelek hunermendên din di wê baweriyê de ye ku hunera welatên din, hunera Kurdistanê dagir kiriye û ev yek jî bûye sedem hunermendên Başur werin paş guh xistin.
(kş)