NAVENDA NÛÇEYAN – Bi ser mirina dengbêja têkoşer Eyşê Şan re 26 sal derbas bûn.
Hunermenda kurd Eyşe Şan di 18’ê kanuna 1996’an de jiyana xwe ji dest da. Şan ku di nava gel de bi “Keybanûya Bêtac”, “Eyşana Kurd”, “Eyşe Xan”, “Eyşana Osman”, “Eyşana Elî” dihat binavkirin, 26 sal li pey mirina xwe hişt.
Eyşe Şan, di sala 1938’an de li Amedê ji dayik bû. Stran û dengbêjî di temenê zarokatiyê de gelek bala Şanê dikişînin. Şan, bi xwestina bavê xwe di sala 1958’an de zewicî, ji vê zewacê keçeke wê çêbû û piştî demekê dest ji hevjînê xwe berda. Şan, piştre dest bi gotina stranan kir, plaqên kurdî û tirkî tije kir. Di vê demê de keça Şanê jiyana xwe ji dest da. Ji ber stranên kurdî bi gelek zextan re rûbirû ma û di sala 1972’yan de sirgûnî Almanyayê hate kirin.
Şan, di sala 1979’an de çû Bexdayê û di Radyoya Bexdayê de Mihemed Arif Cîzrawî, Hesen Cizrawî, Tehsîn Taha, Meryem Xan, Îsa Berwarî û gelek dengbêj û hunermendêm din nas kir, di nava wan de pir hate heskirin. Piştî demekê li vir ma, xwest ku vegere Amedê lê belê ji ber astengiya xizmên xwe nekarî vê xwestina xwe pêk bîne. Şan, di 18’ê kanuna 1996’an de li Îzmîrê ji ber nexweşiya penceşêrê jiyana xwe ji dest da. Şanê xwestibû ku cenazeyê wê li Amedê were veşartin lê belê ev daxwaza wê pêk nehat.
Şan, bi xebatên xwe û sekna xwe ya li dijî serdestiya mêr li ber xwe da û wek dengbêjeke navdar di nava dengbêjên jin de cihê xwe girt.
