Ew hay ji dinyaya xwe heye
90 salî ye lê wek ciwanekî dixebite
Behra ku ew lê jiyaye, berê ji bo masiyan pirr girîng bû, lê van çend salên dawiyê zêde hatiye qirêjkirin û jiyana heywanên di nav behrê de di tehlûkeyê de ye. Nexasim jî plastîkên ku carekê tên bikaranîn û paşê tên avêtin, tehlûkeya herî mezin e ji bo wan. Ji ber wê, Wayan Nyo van salên xwe yên dawiyê bêhtir bi paqijkirina behrê dibihurîne û weke berê masiyan nagire. Ew vê yekê bi hezkirin dike û ji dilê wî tê. Helbet di vî karî de ew tenê nîne, hevjîna wî jî li gel wî ye û bi hev re vî karî dikin. Her wiha zarok û neviyên wan jî hay ji vê helwêsta wan hene û ew jî carê bi wan re dibin alîkar.
Ev belgefilma Dana Frankoff, Dengê li ser avê, sala 2021’ê li “Festîvala Filman a Navteweyî ya Okyanûsan” hatiye nîşandan. Wekî din li “Festîvala Filman a San Luis Obispo” jî hatiye nîşandan û li wir xelata “Belgefilma herî baş ya kurt” wergirtiye.
