Hunermendên Kurd û Ereb diyarkirin ku huner dikare ji bo aştiya civakê, rolek baş bilîze. Hunermendan bang li aliyên siyasî kirin da ku pirsgirêkan bi rêyên aştiyê çareser bikin.
Hunermendên Kurd û Ereb derbarê rola huner ya di jiyana hevbeş, aştiya navbera netew û aliyên siyasî de, ji Rojnews re axivîn.
Şêwekar Salih Nasir niştecihê bajarê Beqube ya ser bi navenda parêzgeha Diyalayê ye, Salih Nasir hunerê bi aştiyê bi navkir û got; “Huner nameyek aştiyê ya ji bo jiyana hevbeş a navbera netew û hemû sînoran deye. Huner xwe digihîne hemû çengên civakê, hunermend divê bi hunera xwe hertim hewla aştî û dawî anîna şer bidin. Ez bang li hemû aliyên siyasî dikim da ku pirsgirêkên xwe bi rêya guftugoyê çareser bikin.”
Nasir di dewamê de got; “Divê hemû pêkhateyên civakê ji bo lihevnêzîkbûnê, çav berdin ser hunerê û nakokiyên xwe bidin aliyekê. Li gorî min hunermend dikarin bi karê xwe ya xweşik, nakokiya navbera pêkhateyan de dawî bikin û aştiyek mayînde bînin.”
Derhêner Cîhad Deloyî jî hunerê weke dibistanek mezin bi nav kir û wiha axivî; “Huner ji bo mijara aştî û dûrketina li şer, dibistanek mezine. Di heman demê de huner amrazek ji bo komkirina aliyên bi nakok û çêbûna aştiyê ye.”
Cîhad Deloyî herî dawî bang li hunermendan kir da ku ji bo dawî anîna şer û nakokiyan kar bikin.
(nr)
