Kovara Îsyas a taybet girêdayî çîrokên biyanî piştî sê salan careke din dest bi weşanê kir. Kovar bi zaravayê Soranî, Kelhurî, Kurmancî tê amadekirin.
Di havîna sala 2015’an de Kovara Îlyan bi 118 rûpelan dest bi weşanê kir. Heta sala 2017’an 6 hejmarên kovarê hate çapkirin. Piştre ji ber rewşa xerab a aborî weşandina kovarê hate rawestandin. Xwediyê kovarê bi xwe xerca çapê dida û parvekirina wê jî li ser milê wan bû.
Xwediyê Kovara Îlyan Aram Semîn ji Rojnews’ê re got;”Piştî sê salên rawestandina kovarê ya ji ber rewşa darayî wê hejmara nû ya Kovara Îlyan were weşandin. Wê bi bername û planek nû dest bi weşana xwe bike û wê projeya me berdewam bike. Kovara Îlyan li ser du astan kar kiriye. Ji wergera çîrok, mijaran û çîrokên hemû zaravayên Kurdî pêk tê.”
Aram da zanîn ku di govarê de bi 9 zimanên; Fransî, Îngilîzî, Swêde, Rusî, Erebî, Farisî, Spanî, Tirkî û Elmanî, mijar bi zimanê Kurdî hatine wergerandin. Heya niha nêzî 400 çîrok ji bilî gotar û hevpeyvînan hatine wergerandin.
Aram Semîn derbarê hejmara nû ya govarê de jî got; “Niha hejmara 7 ya govarê bi 425 laperan ku tê de çîrok, xwendin, hevpeyvîn û lêkolîn heye, ji çapxaneyê derketiye. Di rojên bê de wê govar bigihe pirtûkxaneyên Rojhilat û Başûrê Kurdistanê.”
Li ser bergê hejmara nû ya govarê wêneyek serokkomarê Tirk Receb Tayîp Erdogan hatiye danîn û di destê Erdogan de jî wêneyê zarokên ku di bombebaran û dagirkeriya dewleta Tirk de jiyana xwe ji dest dane, heye.
Aram Semîn derbarê wêneyê Erdogan de jî got; “Ev girêdayî xebata çandî û ferhengî ya bi xebata netewiye. Ji ber ku di kesayeta Erdogan de tevlîhevî û faşîzm li Rojhilat, Rojava û kevneperestiya olî û rêgezperestî tund bûye.”
(rn)
