Kurdolog, dîroknas û nivîskar Celîlê Celîl ê bi dehan sal in li ser folklora kurdî dixebite û heta niha gelek pirtûk nivîsîne, bi rêya rojnameya me Xwebûnê bang li kurdan kir ku berhemên der barê folklora kurdî de jê re bişînin.
Banga Celîlê Celîl wiha ye:
“Dot û pisên kurdan ên hêja! Çûk û mezinên şîrîn! Ez ji we hêvî dikim, di pirseke girîng da aliyê min bikin. Ew pirs li ser mijara ‘Kal û pîrên min’e. Li gorî karîna xwe li ser vê mijarê binivîsin, binivîsin, çiku ji kal û pîrên we bîra weda maye.
– Advertisement –
Binivîsin: nav û kunyata wan; serboriya wan; xeyset, teybetmendiyên wan; li ser çaranûsa wan; zanebûna wan li ser zargotinê (çi stran, çîrok, destan û hwd dizanibûn, ji we ra gotine, çawa digotin (bi kêf, bi eşq, bi heybet…); çawa zargotin dinirxandin; hêjaya zimanê kurdî bi çi rengî dinirxandin; kurdbûna xwe çawa diparastin (erf, edetên wan ên şexsî); terbiyekirina zaroyan, şîretkarî li ser ‘başî’ û ‘xirabiyê’.
Binivîsin hûn her kes: çûk û mezin, ahil û cahil, qîz û xort; kal û pîrên we çi çîrok û stran, yan jî destan, gotinên pêşiyan hwd digotin û jê çi di bîra we da maye? Çawa digotin, hunera gotina wan çawa bû? Çi digotin, yan jî di dewra wan da çawa bûne ode (li gundan), konên sohbeta (li zozanan)?
Ji kerema xwe, tevî nivîsa xwe du-sê fotoyên kal û pîrên xwe: tenê, tevî neferên malê, gundên hêwra wan, xaniyên kal û pîran (heger hebin) pê ra bişînin.
Bişînin bi nivîsar, yan jî dengê axaftina xwe, bi vîdeo (telefon, maîl). Heger kal û pîrên we sax bin, dengê wan jî bişînin, pirsyaran ji wan bikin!”
Maîla Celîlê Celîl: jaliljalile@gmail.com
