ÎZMÎR – Ma Music, piştî Enqere û Stenbolê, li Navenda Çandê ya Nazim Hîkmet a Îzmîrê konserek li dar xist.
Ma Music ku dest bi rêzekonseran kiriye, piştî Enqere û Stenbolê li Navenda Çandê ya Nazim Hîkmetê ya Îzmîrê jî konserek li dar xist. Bi sedan welatî beşdarî konserê bûn. Di konserê de strana ewil diyarî Jîna Emîniyê ku qetilkirina wê li Rojhilatê Kurdistanê û Îranê bû cihê serîhildaneke mezin û rizgarkirina Kobanê hat kirin.
Welatiyên ku cihê wan li hêwana konserê nema, li ser pêyan li konserê guhdar kir. Di konserê de stranên Erdewan Zaxoyî, Eyaz Yûsiv, Merûf, Reşîdê Cindî, Alî Baran, Îsa Berwarî, Şukrî Rêkanî û stranên Radyoya Êrivanê, yên herêma Dersim, Behdînan û Botanê hatin gotin. Guhdarvanan bi çepik û tilîliyan hevrêtiya hunermendan kirin.
Di dawiya konserê de welatiyan li ser pêyan li çepikan xistin.
Di dawiya konserê de li ser navê Ma Musicê Şêrko Kanîwar malavayiya her kesî kir û got: “Çi dibe bila bibe em ê zarokên vî welatî bê muzîk nehêlin. Tenê ne zarok, em ê malbatên wan jî bê muzîk nehêlin. Hûn çi qas xwedî li vê çandê û muzîkê derkevin, ev çand û muzîk dê ev qasî pêş bikeve. Em ê careke din jî bên.”
