Li navçeya Ranya ya navenda îdareya Raperînê 1’emîn Festivala Beyt û Heyran bi tevlibûna dengbêjên Başûr û Rojhilatê Kurdistanê hate lidarxistin.
Îro li navçeya Ranya ya navenda îdareya Raperînê 1’emîn Festivala Beyt û Heyran ji aliyê Rêveberiya Rewşenbîrî û Hunerî ya Ranyayê ve hate lidarxistin.
Têkildarî lidarxistina festivalê Rêveberê Rêvebertiya Rewşenbîrî û Hunerî ya Ranyayê Osman Resûl ji Rojnews’ê re axivî û got: “Me pêwîstî pê dît ku di rewşa niha ya ku Herêma Kurdistan û Iraq têde derbas dibe em festivalek bi vî rengî lidarxin. Gelek sitranbêj û heyranbêjên ji Başûr û Rojhilatê Kurdistanê tevli festivalê bûn. Ev yekemîn festivala beyt û heyranan e li Ranyayê tê lidarxistin. Em ê hewil bidin di dema pêş de jî festivalek ku ji her çar parçên Kurdistanê hunermend bejdar bibin li Ranyayê lidarxin.”
Hunermend Selah Xezerî yê ji bajarê Mihabad a Rojhilatê Kurdistanê tevli festivalê bûye jî got; “Gelê Kurd xwedî ziman û çandek dewlemende. Her deverek xwedî taybetmendiyek xwe ya cûda heye. Lê li Başûrê Kurdistanê hunera Kurdî ber bi lewaziyê ve diçe. Bi taybetî beyt û heyran gotin li Başûrê Kurdistanê hatiye paşguhxistin.”
(kş)
