Jinên Kurd çawan di şoreşa Kurdistanê de cihê xwe girtibe, rengê xwe dabe û dengê xwe tevlî awaza şoreşê kiribe di warê wêjeyê de jî ristek girîng lîstiye. Her çiqas berhemên tên xwestin heta niha kêm mabe jî em dikarin deng û rengên wan di vê dîlana awazê de bibihîzin. Yek ji van jinan jî jina têkoşer Medya Yaklav e ku ji ber raman û têkoşîna xwe hatiye girtin û ji ber cezayê mûebetê ev 27 sal e girtî ye. Yekemîn pirtûka helbestan a Medya Yaklav di meha Tebaxê de ji aliyê Weşanxaneya Aram ve hate çapkirin.
Nivîskar di pirtûka helbestan de ya bi navê ‘Welatê Min’ balê dikêşe li ser êşên gelê Kurd, hesret, hêvî û qîrîna azadiyê. Nîvîskar xwestiye di pirtûka xwe de bi hest û çavên ferdeke ji vî gelê ku welatê wê bûye çar parçe, lê tevî her tiştî li ber xwe dide û têdikoşe bê jiyan bi çi rengî dikare xwe di helbestê de bihûne bîne ziman. Di pirtûkê de 91 helbest hene û ev helbest di qonax û dîrokên cuda de, her wiha li girtîgehên bajarên cuda ên li Kurdistan û Tirkiyeyê hatiye nivîsandiye.
MEDYA YAKLAV KÎ YE?
Nivîskar Medya Yaklav di sala 1971’an de li navçeya Şemrexê ya Mêrdînê hatiye dinê. Nivîskar dibistana seretahî li navçeyê heta pola 5’an xwendiye. Di sala 1990’an de bi mirovê xwe yê bi navê Abdullah Yaklav re dizewice. Piştî demekê hevjînê wê Abdullah Yaklav bi hinceta der barê wî de gilî heye hate binçavkirin û di êşkenceyek hovan e re derbas dibe. Piştî Abdullah Yaklav tê berdan, êş, azar û êrîşên hovane yên dewletê yên li ser Gelê Kurd ji kûrahiya dilê xwe hîs dike û bi hevsera xwe Medya Yaklav re berê xwe dide çiyayên Kurdistanê û tevlî nava refên PKK’ê dibin. Medya Yaklav di sala 1993’an de li Amedê tê binçavkirin û bi cezaya mûebetê tê girtin. Nivîskar 27 sal in girtî ye û niha di Girtîgeha Jinan a Sîncana Enqereyê de tê girtin. Ev pirtûk yekemîn pirtûka helbestan a nivîskar e.
RISTIK
Di evîn û cengê de
Tu nefesek şîn î!
Di mirin û jiyanê de ez,
Kespikek jîn im!
Ez keça Al-lat im!
Tu neviyê Hoşeng î
A rast ew e ku em kulîlk in!
Kulîlkên Rojhilatî û bi ROJÊ mêjandin e.
Ji rehên dilê xwe ristikekî rêz dikim.
Li ristikê niqit niqit bi xwîna xwe,
Xelata min ev e ji te re
der-vî vê tiştekî min tineye
Di berbangek çiyayên Licê
ber bi meskenê
an li Cizîra seydan
ku xwe noqî azadiyê kirine
vê ristikê dixime situyê te
ez xwe bijîn im! WELATÊ MIN
