Nivîskar Ehmed Mihmed hêjayî Xelata Karo ya Baştirîn Nivîskar hate dîtin. Nivîskar Ehmed Mihemed yê ku temenê wî 77 sale heta niha 50 pirtûk nivîsiye yan jî werger kiriye.
Di saetên êvarê de li Hola Malbenda Rewşenbîrî ya Silêmaniyê, merasîma Xelata Karo ya Baştirîn Nivîskar hate lidarxistin. Di merasîmê de gelek nivîskar û welatî amade bûn.
Xelata Karo ya ku ev du sal in ji aliyê Çapxaneya Karo ve bi armanca nasandina nivîskarên di wêjeya Kurdî de xwedî ezmûn lidardixe, îsal pêşkêşî Nivîskar Ehmed Mihemed Îsmaîl hate kirin.
Di destpêka merasîmê de Waliyê Silêmaniyê Heval Ebobekir li ser rola nivîskaran a di wêjeya Kurdî de axaftinek kir. Heval Ebobekir got, “Wêje parçeyeke ji bajarê Silêmaniyê. Ji ber hewildan û pêşkeftina nivîskaran Silêmanî wek bajarê wêjeyê hatiye naskirin.”
Piştre Xelata Karo ya Baştirîn Nivîskar ji aliyê Nivîskar Mardîn Omer ve pêşkêşî Nivîskar Ehmed Mihemed Îsmaîl hate kirin. Her wiha di merasîmê de pirtûka nû ya Ehmed Mihemed ya bi navê ‘Xewne bêserûberekan’ hate nasandin û belavkirin.
Merasîmê piştre bi gotina stran û muzîkê berdewam kir.
Ehmed Mihemed Îsmaîl di sala 1943’an de li gundê Hefte Xarî yê navçeya Xurmato hatiye dinê. Sê zarokên wî hene, heta niha 50 pirtûkên ku piraniya wan çîrokin, nivîsiye yan jî werger kiriye.
Niha jî wergera du pirtûkên li ser jinên Şengal û şervanên jin ên bi navê ‘Keçên Laleş’ û ‘Periyên çiya’ dike.
(kş)
