Komeleya AVESTA ku ji bo zimanê Kurdî dixebite û di 4 salan de kurs daye zêdetirî 3 hezar kesan, kursên nû vedike. Serokê komeleyê Alî Yalçinkaya got, ji bo hînkirina Kurdî hişyarbûneke nû heye. Komeleya Lêkolînên Ziman û Çandê (AVESTA) sala 2018’an de li Îzmîrê hatiye avakirin.
Serokê komeleya AVESTA’yê Alî Yalçinkaya got: “Li Rojhilat Navîn hin ziman ji holê rabûne. Gelê ku zimanê wî winda bibe, bi awayekî fizîkî jî winda dibe. Lewma em bi xebatên di warê ziman de hewl didin hebûna xwe biparêzin.”
Yalçinkaya di dawiyê de bang li Kurdan kir da ku xwedî li zimanê xwe derkevin: “Tenê ne bi kursan, divê em zimanê xwe li her warê jiyanê biparêzin. Em qeydan li ser hesabên medyaya dijîtal jî çêdikin.”
